Monday, December 17, 2012

මේ ලෝකයෙන් වෙන් ව මේ සසර නිමකරම්



















නිල්අහස සාගරය නොපෙනෙන්න වෙන්වෙලා
රජකරපු හිරු කුමරු සිහසුනද හැරගියා
ඈත දියඹට ගිහින් නැව් කඳක් තනිවෙලා
කොළඹ හුළඟට මගේ කටු ඔටුනු විසිකලා.

රළ පෙලක් පිටු පසින් රළ පෙලක් නැඟෙන්නේ 
මේකුලක් පිටුපසින් මේකුලක් සරන්නේ
ලිහිණියෙක් පිටුපසින් ලිහිණියෙක් සරන්නේ
අද මගේ පිටුපසින් ඔබව නැහැ පෙ‍නෙන්නේ.

මීවිතින් මත්නොවී මගේ නෙත් නිරුවතින්
පහන් කණුවක් දිලෙයි ගණදුරට පෙම්කරන්
කදෝපැණි එලියකට කසුන් හිරුරැස් කියන්
මේ ලෝකයෙන් වෙන් ව මේ සසර නිමකරම්. 

Wednesday, October 3, 2012

වසන්තය තව නැතී















ඔබව නො‍පෙනෙන්න මා නෙතු පියා ගන්නද?
ඒත් ඔබ පෙනෙනවා මාව අඬවන්නද?
ඔබ ඔබේ මඟ අතැර මගෙ ම‍‍ඟේ යන්නද?
ඒත් ඔබ මා ළඟින් ඔබව එලවන්නද?

ජීවිතේ මෙතෙක් දුර පැමිනියේ ඔබ නිසා
අරමුණක් ගැන නොදැන ම'සිත වල්මත් වෙලා
ඔබෙ මතක රැඳුණු තැන් ඉවත විසි කොට දමා
ඈත යන්නේ කෙලෙස ජීවිතය හිස් වෙලා

තරු කඩා වැටුනාට සඳට තනියක් නැතී
සමනලුන් නැති මලට බඹරු අඩුවක් නැතී
මං නොමැති ජීවිතේ ඔබට තනියක් නැතී
විකල් කොවුලන් හඬති වසන්තය තව නැතී

Sunday, August 12, 2012

මගේ කවිය හා ඇගේ කවිය (කවි ලියන සොඳුරු හිත නපුරුයි ද ඔය තරම් )















ඔය ගැඹුරු නෙත් දෙකේ මගෙ රුව ම පෙනෙනකං
ඔබෙ සුසුම් රැල් වැදී මගේ මුව තෙමෙනකං
රත්තරං පපුතුරෙහි මොහොතකට හිස හොවන්
ආදරය විඳින්නට අවසරද මට කියන්

ඔය සුරතෙ එල්ලිලා ළදැරියක් වාගෙ මං 
දුර අහසෙ ඉගිලෙමී කිරිලියක වෙස් අරං 
ඒ හීනෙ මට දෙන්න ලෝබ වෙන්නට තරම් 
කවි ලියන සොඳුරු හිත නපුරුයි ද ඔය තරම්

රටා ඇඳි සුදෝ සුදු හද මළුව හැඩිකරං 
පෙර තැබූ පා කැලලි අමතකව යන තරම් 
පුන් පෝයදා අහසෙ නැඟුණු සඳවත ලෙසින් 
ඔබෙ ලොවට එළිය දෙමි පිලිගන්න මා ඉතින්

Monday, July 30, 2012

හොයාගෙන බලන්න (4) - Braveheart



"They may take our lives, but they'll never take our freedom!"
             
(සත්‍ය ඓතිහාසික කථාන්දරයක් ඇසුරෙනි.)
                "William Wallace" ස්කොට්ලන්තය යටත් කරගෙන සිටි කෘර පාලක 'Longshanks' ගේ පාලනයට විරුද්ධව විප්ලවකාරී කැරලි දියත් කල අයෙකි. තම මාතෘ භූමියේ නිදහස වෙනුවෙන් ඉංග්‍රීසි හමුදාවන්ට එරෙහිව සටන්කල ඔහුගේ පියා හා සොහොයුරා කුඩා කාලයේදී ම ඔහුට අහිමි වෙයි. නමුත් ඔහුගේ ආදරියද ඔහුට අහිමි වීමෙන් නෙත් හැරුණු William Wallace ස්කොට්ලන්තය නිදහස් කරගැනීමේ සටන, ඔටුන්න හිමි කුමරා වන "Robert the Bruce" සමඟ දියත් කරයි.
                මෙම සටනේ තීරනාත්මක මොහොතේදී එංගලන්ත රජුගේ වරප්‍රසාද වලට ලොල්වන ස්කොට්ලන්ත රදළයන්ගේ සහාය නොලැබී යන අතර Robert ගේ පියාගේ හා රදළයන්ගේ කුමන්ත්‍රණයක ප්‍රතිඵලයක් වශයෙන් Wallace අල්ලා එංගලන්තයට භාර දෙනු ලබයි.
                 Wallace ලන්ඩන් අධිකරණයට පමුණුවන අතර ඔහුට පවසන්නේ තමා එංගලන්ත රජුට ද්‍රෝහි වූ බවත් ඒ පිලිබඳව සමාව අයැද සිටියහොත් ඔහුට ඉක්මන්,පහසු මරණයක් හිමිකර දෙන බවයි. සමාව අයැදීම ප්‍රතික්ෂේප කරන Wallace ගේ අතුනුබහන්(බඩවැල්) එලියට ඇද දමද්දීත්, රාජ්‍ය ද්‍රෝහියාගේ සමාව අයැදීමේ වේදනාත්මක කෙඳිරිල්ල ඇසීමට පැමිණි ජනයාට සහ පණ අදිමින් සිටින Longshanks ට ඇසෙන්නේ එකම වදනකි;

Monday, July 16, 2012

හිත තවම හයියයි මගේ


ජීවිතය සොඳුරුයි කියා     
ලියූ කවි පද පිටු පුරා     
මැකී යන්නට දෙන්නෙ නෑ     
හිත තවම හයියයි මගේ     

දිනෙක ඔබ ඒ යැයි කියා     
පැතූ පැතුමන් හිතපුරා     
බොඳව යන්නට දෙන්නෙ නෑ    
හිත තවම හයියයි මගේ    

වසන්තය ඒ යැයි කියා     
ඇස් රිදෙන කල් බලා හිටියා    
පයක් පස්සට ගන්නෙ නෑ    
හිත තවම හයියයි මගේ

Sunday, July 1, 2012

හොයාගෙන බලන්න (3) - The Terminal

             
             John F. Kennedy ගුවන් තොටුපලට ගොඩබසින Viktor Novorski ගේ ගුවන් බලපත්‍රය වලංගු නොවන බව හදිසියේ ම පරිඝණකය මඟින් හඳුනා ගැනෙයි. මේ හේතුවෙන් ඇමෙරිකාවට ඇතුළුවීමට අවසර නැතිබව ගුවන්තොටුපල බලධාරීන් ඔහුට දන්වා සිටියි. ඔහු ගුවනින් පැමිණෙන අතරතුර ඔහුගේ මවුබිම වන Krakozhia වෙහි (මන:කල්පිත රටකි) විප්ලවකාරී ක්‍රියා හේතුවෙන් සිවිල් යුද වාතාවරණයක් මතුවී තිබේ. මෙම තත්වය මත ඇමෙරිකාව තවදුරටත් Krakozhia ව ස්වෛරී රාජ්‍යයක් වශයෙන් පිළිනොගැනීම හේතුවෙන් ඔහුට ඇමෙරිකාවට ඇතුල් වීම තහනම් කෙරෙයි. ඔහුට ගුවන් තොටුපලින් එලියට යාමට ද නොහැකි ය; නැවත තම රට වෙත යාමට ද නොහැකි ය. මේ සියලු කාරණා මත ඔහු ගුවන් තොටුපල පර්යන්තයෙහි සිරකරුවෙකු වන අතර ඔහුගේ අභිරහස් Peanut Can (රටකජු කෑනය) එක සමඟ ගුවන්තොටුපල පර්යන්තයෙහි ජීවත්වීමට පටන්ගනියි.
              මෙම චිත්‍රපටයෙහි තේමාවේ එන පරිදි ම චිත්‍රපටයේ චරිත මඟින් අපෙන් නැවත නැවත අසන ප්‍රශ්ණයක් ඇත. “ඔබ මඟ බලා හිඳින්නේ කුමක් වෙනුවෙන්ද“? කෙනෙකු ප්‍රමාද වුණු ගුවන් යානයක් එනතුරු ද කෙනෙකු තමා කරන නීරස රැකියාවෙහි විශ්‍රාම වැටුප ලැබෙනතුරු ද කෙනෙකු තම සිතෙහි ඇඳුණු පිවිතුරු ආදරය පැමිණෙන තුරු ද මඟ බලා සිටින අතරතුර Viktor Novorski නිව්යෝක් නගරයට පය තැබීම සඳහා මඟ බලාගෙන සිටියි. “ඔබ මඟ බලා හිඳින්නේ කුමක් වෙනුවෙන්ද“? ගුවන් තොටුපල තරම් මෙම ප්‍රශ්ණය අප වෙත දමාගැසීමට සඳහා සුදුසු ම පසුබිමක් සපයන තවත් තැනක් නොමැත. නියම පුද්ගලයා වෙනුවෙන් නියම මොහොත වෙනුවෙන් නියම තීරණය වෙනුවෙන් අපි අපේ මුළු ජීවිත කාලය පුරා ම බලා හිඳිමු. 
                එක් දිනයකදී Viktor විසින් ගුවන් තොටුපල පර්යන්තයේදී හමුවන සුරූපිනියක වන Amelia හට පවසනුයේ තමා නිව්යෝක් නගරයට පැමිණෙනුයේ Saxophone (සැක්සෆෝන්) වාදකයෙකු වන Benny Golson ගේ සමරු අත්සනක් ලබා ගැනීමට බව ය. මෙහි දී හෙලිවන කරුණ වන්නේ ඔහු සුරැකිව ලඟ තබාගෙන සිටින Peanut ටින් එක තුල තිබුණේ  වෙන කුමක්වත් නොව “Great day in Harlem“ නම් ප්‍රකට ඡායාරූපය හා තවත් සමරු අත්සන් රාශියක් බවයි.
                උග්‍ර ජෑස් (Jazz) සංගීත ලෝලියෙකු වන ඔහුගේ පියා 1958 දී හංගේරියානු පුවත්පතකින් මෙම ඡායාරූපය සොයාගත් පසු ඡායාරූපයේ සිටින ජෑස් සංගීතඥයන් 57 දෙනාගේ ම සමරු අත්සන් ලබාගන්නා බවට ප්‍රතිඥා දී ඇති ඇත. ඔහු අත්සන් 56 ක් ලබාගැනීමට සමත් වූවත් එම කාර්යය සම්පූර්ණ කිරීමට පෙර ඔහු මියගොස් ඇත.Viktor නිව්යෝක් නගරයට පැමිණෙන්නේ මෙම කාර්යය සම්පූර්ණ කිරීම සඳහා ය.


"Life is waiting"
“ජීවිතය යනු බලාපොරොත්තුවයි“

"Great day in Harlem"

Trailer එක බලන්න 

Friday, June 15, 2012

මේ බැඳීමට නෑ කිසි නමක්


මට ඔබේ වන්නට බැරි වුනත්
ඔබ මගේ වන්නට බැරි වුනත්
අපි අපේ වන්නට බැරිවුනත් 
මේ බැඳීමත් මහ අරුමයක්.

පොඩි උන් වගේ අපි තරහ වෙන
හසරැලි නඟා යලි යහළු වෙන.
මිතුදමකි මේ මිතුදම නොවන
මිතුදම ද කිසිදා නොහඳුනන.

ලොව නමක් නැති දේවල් නැතත් 
මේ ආදරය බව දැන දැනත් 
අපෙ බැඳීමට දෙමු එක නමක්
මේ බැඳීමට නෑ කිසි නමක්. 

Saturday, June 2, 2012

තව හඬන්නට මට කඳුළු නෑ...




ඇය - ඔබ දුර නොයන් මට මේ තරම්
          ඔබ ළඟ ඉන්න බැරිවෙන තරම්. 

ඔහු  - මට ළං නොවෙන් ඔබ මේ තරම්
          මට දුර යන්න බැරිවෙන තරම්. 

ඇය - ඔහුගෙන් නොලද සෙනෙහස අරං
         ආ වසන්තය ඇයි පමා වී. 

ඔහු  - මගෙ ඉරි තැළුණු හදවත අරං 
          යමි නවාතැන තව දුර වැඩී. 

ඇය - ඔබෙ උර මඬල මා හිස හොවන් 
          සුව විඳින්නට මට වරම් නෑ. 

ඔහු  - පරසතු මලට මගෙ හිත බැඳන් 
          තව හඬන්නට මට කඳුළු නෑ.

Friday, May 18, 2012

හොයාගෙන බලන්න

      
               ඉරානයේ දකුණු ටෙහෙරානයේ  දුප්පත් පවුලක සාමාජිකයෙකු වන ‘අලී‘ අන්ඩ දැමීමට ටව්මට ගෙනා ඔහුගේ නැඟනියගේ එකම සපත්තු ජෝඩුව නැතිකරගනී. දුප්පත්කමින් මිරිකී සිටින සිය දෙමාපියන්ට මෙම අහිමිවීම හෙලි නොකිරීමට ඔවුන් ගිවිස ගනිති. අලීගේ කැන්වස් සපත්තු ජෝඩුව ‘සාරා‘ විසින් උදෑසන පාසලට දමන අතර නිවසින් පිටව පාසලට නොගොස් අතරමඟ නැවතී සිටින අලී වෙත ගෙනවිත් දෙන්නීය. මේ හේතුවෙන් දීප්තිමත් ශිෂ්‍යෙයකු වන අලී තෙවරක් ම පාසල් යාමට ප්‍රමාද වේ. මේ සෙල්ලම හැමදා කිරීමට නොහැකි ය.
                 
               සාරාට ඇගේ නැතිවූ සපත්තු ජෝඩුව සොයාගැනීමට හැකිවෙයිද? අලීට ඔහුගේ නැඟනිය වෙනුවෙන් සපත්තු ජෝඩුවක් දිනාගැනීමට හැකිවෙයිද? අලුත් සපත්තු ජෝඩුවක් ගෙනඒම සඳහා ඔවුන්ගේ පියාට මුදල් සොයාගැනීමට හැකිවෙයිද?

බිම්අඟලක් වෙනුවෙන් ගහමරාගන්නා ලෝකයේ අණ්ඩ දැමූ කුඩා රෝසපාට සපත්තු ජෝඩුවක් වෙනුවෙන් හටන් කරන පුංචි එවුන්ගේ හිත් මොනතරම් අහිංසකද පරිත්‍යාගශීලීද?


IMDB බලන්න 
Wikipedia යන්න 
Trailer එක බලන්න 

Wednesday, May 2, 2012

සඳක සඳ හිනැහිලා...














සඳපාට සොරාගෙන 
                    කොඳ මලිති පිපෙන්නේ 
සඳක සඳ හිනැහිලා 
                    මට කතා කරන්නේ 

නෙතුපියන් යට රැඳුණු 
                    ඔබේ රුව මවමි මා
 බොඳ වලා මීඳුමේ 
                    ඔබ ඇවිත් හිනැහෙනා

ඔබ දකින පුර සඳයි 
                    මම මෙහේ දකින්නේ 
ඔබ කෙතෙක් දුර වුවත් 
                    මා ළඟයි සිතෙන්නේ 

Tuesday, April 24, 2012

හොයාගෙන අහන්න



                     Il Divo යනු සංගීත කලමනාකරුවෙකු හා රියැලිටි ටීවී විනිසුරුවරයෙකු වන Simon Cowell විසින් 2004 දී ගොඩනඟන ලද Sebastian Iazambard, Carlos Marin, David Miller හා Urs Buhler යන ගායකයන්ගෙන් සැදුම්ලත් ඔපෙරාරූපී පොප් ගායක කන්ඩායමකි. මාහට අහම්බෙන් අසන්නට ලැබුණු Regresa A Mi ( Unbreak My Heart ...) යන මේ ගීතයේ භාෂාව නොතේරුනද ඇසූ දා සිට මේ දක්වා මෙම ගීතය සියක් වාරයක් රසවිඳ ඇත්තෙමි.

හිඟන්නා ගයන්නේ බඩිනි, බොරුකාරයා ගයන්නේ උගුරිනි, නියම සංගීතවේදියා ගයන්නේ හදවතිනි. නමුදු මුළු සිරුරින් ම ගයන ගායකයෙකු මේ තරම් ලංව මා දැක නොතිබිනි.

නියම ගායනය යනු කුමක්ද? ඔබට පිළිතුරක් ලැබේවි ...


  



Friday, April 20, 2012

හොයාගෙන බලන්න

                මිලියනපති Edward Cole හා වැඩකරන පන්තියේ මිකැනික්වරයෙකු වන Cater Chamber අතර කිසිදු සමානකමක් දක්නට නොමැත, නමුදු ඔවුන්ගේ පෙනහළු පිලිකා හැර ය. ඔවුන්ගේ ජීවන මංසලේදී එකම රෝහල් කාමරයක් හවුලේ බෙදාගන්නා අතර ජීවිතය ගැන පසුතැවීම අතහැර දමා ජීවිතයේ කිරීමට කැමති වූ කිරීමට නොහැකි වූ සියලු දේවල් කිරීමට ගිවිස ගනිති. ඒ ඔවුන් "වල කජ්ජ ගැසීමට" පෙරය (before they "kick the bucket"). ඔවුන් දෙදෙනා ම එකතු වී "වැඩ ලැයිස්තුවක්" ("bucket list") සාදන අතර ඒ ලැයිස්තුව අනුව ජීවිතය සොයායාමේ වික්‍රමාන්විත චාරිකාවට සම්ප්‍රාප්ත වෙති. මේ ගමනේ දී ඔවුන් ජීවිතයේ සැබෑ අරුත, සුන්දරත්වය හා සතුට වටහා ගනිති.


"You only live once, so why not die with style?"

Monday, April 16, 2012

මගේ පුංචි සුරංගනාවී













දඟකාර ඔබේ කෙහෙමඬල මා සිඹිනවා 
සිහින් හිරු කෙඳි ඇවිත් මාව ඇහැරවනවා 
කවුළුවෙන් එන සුළඟ මගේ නෙතු පියවලා 
දෝත පුරවා ගෙනත් බිංදු පිනි ඉහිනවා 
ආදරය කියන්නේ මේකදෝ 
ජීවිතය දැනෙන්නේ මෙහෙමදෝ 
කියාදෙන්න මගේ පුංචි සුරංගනාවී 


හිසපුරා රිදීසුණු මල් වැස්ස හැලෙනවා 
දෑත වත විදාගෙන මං ඔහේ තෙමෙනවා 
තියන තියනා පයට වලා පාවඩ එලා
අනන්තය සොයාගෙන අයාලේ ඉගිලෙනා
ආදරය කියන්නේ මේකදෝ 
ජීවිතය දැනෙන්නේ මෙහෙමදෝ 
කියාදෙන්න මගේ පුංචි සුරංගනාවී 


ඔබව සිහිවී තනිව සිනාසෙන මා දිහා 
ළඳුන් හිනැහී බලයි මට උමතු දැයි කියා 
අත් පොඩිති වන වනා සිඟිති කිරි සිනා පා 
නාඳුනන පොඩිත්තෙක් මවෙත සමු දී ගියා 
ආදරය කියන්නේ මේකදෝ 
ජීවිතය දැනෙන්නේ මෙහෙමදෝ 
කියාදෙන්න මගේ පුංචි සුරංගනාවී

Tuesday, April 10, 2012

ඇත්තට ම ජීවිතය සුන්දරද මේ තරම් (මතු යම් දවසක විඳිනු පිනිස....)













අපේ ලොව සරසන්න සත්පාට මීදුමෙන්
මේ පොලොව තෙත්කරමි ලේ කඳුළු දහඩියෙන්
තෙරක් නැති කම්කටොලු පිලිගනිමි සිනහවෙන්
ජීවිතය හැර නොයමි සොඳුරියේ නුඹ නමින්

නළලතේ දෙතොල් පෙති තිලක රූ අඳින්නී
හදවතේ සෙනෙහසේ ගී කුරුටු ගාන්නී
නුඹ උකුල සිරියහන හිස හොවාගෙන ඉමී
මෙරක් බර ගැටලු පොදි සුළඟෙ පා කරනෙමී

මගේ ලෝකෙට එළිය සතුට සිනහව අරන්
කොහේ සිට ආවාද මිහිරියේ මට කියන්
මේ විඳින සියලු දෙය සිහිනයක් නොවේ නම්
ඇත්තට ම ජීවිතය සුන්දර ද මේ තරම්

Tuesday, April 3, 2012















ජීවිතයේ එක යුගයක
මා හා හැඬුව සිනාසුන එකට 
ඒ මිනිසුන් නෑ අද ..................කොහේ ගිහින්.
ඒ මිනිසුන් නෑ අද 
කොහේ ගිහින්. 


ආදරයෙන් සිත සුරකින 
හා වී ජීවිතයට ජීවත් වෙන 
ඒ මතකය .......අමතක......... වෙලා ඇතී. 
ඒ මතකය 
අමතක 
වෙලා ඇතී. 

අනාගතේ මතු දිනයක 
මේසා විසල් ලොවක් මැද හමුවන 
ඒ මොහොතේ ...... ඔබ  ..... මා ..... දකිනු ඇතී. 
ඒ මොහොතේ 
ඔබ 
මා 
දකිනු ඇතී.

Friday, March 9, 2012



ලොව මිහිරි සිරි දකින
නෙතට නෙත ඔබෙ නෙතයි.
මගෙ සිතේ කවි උලට
කවිය නුඹ උල්පතයි. 

දඟමල්ල නුඹ ඇවිත් 
හිත පුරා දුවනවා. 
උමතුවෙන් සිනාසෙමි
පිස්සියේ නුඹ නිසා. 

ජීවිතය හොයාගෙන 
නැවතුනේ නුඹ ළඟයි. 
දෝත පිරි ආදරය 
පැංචියේ නුඹටමයි. 

Monday, March 5, 2012

පොත්ගුල්ලා මං 



කඩෙන් ගේන සීනි ගොට්ට
හතර අතේ හරව හරව
පාර දිගේ එමින් ගමන්
ඒකෙ උන්නු සීනි සීය
බෝතලේට පැන්න ගමන්
හිමීට දිගහැර කියෝපු
පොත් ගුල්ලා මං.

බතපත දිගහැර ලිපි කන
අත වේලෙනකං ලිපි කන
අනිත් උන්ට කන්න නොදී
උන්ගෙ බත් පතෙත් ලිපි කන
පොත් ගුල්ලා මං.

අහල ගන්න බ්‍රේක් නැතිව
අනුන්ගෙ පොත් හොරෙන් ම කන
එහෙම කාල අතුරුපසට
උන්ගෙන් ටොකු හොඳට කාපු
පොත් ගුල්ලා මං.

පොත් සාප්පුවලට ගිහින්
පොත් දහයක් තුරුලු කරන්
එලෝනකං පොත් කියෝන‍
පොකට්ටුවේ බර සින්දා
දහයට එකකින් තුටුවෙන
පොත් ගුල්ලා මං.

ගත් පඩියෙන් බඩට නොකන
පරණ ඩෙනිම පට්ට ගහන
ඇඟ බිල්ඩින් ගැන නොහිතා
ඔළු බිල්ඩින් ගැන තැවෙනා
ගෙදර පතල කාබාසිනි
පොත් ගුල්ලා මං.

අතේ පිච්චියක් නැතිකොට
උකසට රන්ලණු නැතිකොට
තියෙන එකම වස්තුව වෙන
පොත්ටික කද බැඳ ගෙනිහින්
සරසවි පාරේ විකුණන
ලොව ම ඉන්න කාලකන්නි
පොත් ගුල්ලා මං.

Tuesday, February 28, 2012

                මගේ ජීවන වෘත්තිය තරම් වෙන කිසිම දෙයකට මා මේ තරම් අවලාද අසා නොමැත. මගේ නෑයන්ට එය අවමානයක් ද මගේ පවුලේ අයට එය අගෞරවයක් ද විය. නමුත් මා, මා සමඟ සාමයෙන් පසු වූයෙමි. කිමද යත් මා ආශා කළ ජීවිතය මා මේ මොහොතේ ගත කරන බැවිනි.
               ගෙලට සිර වූ ටයි පටි ද කදිමට යට කළ දිග අත් කමිස ද දිලිසෙන සපත්තු තුල ද මගේ ආත්මය සිරකිරීමට මා අකමැති වීමි. මට නිදහස් මිනිසෙකු වීමට අවශ්‍ය විනි. මගේ ජීවන සුවඳට මිනිසුන්ගේ දහඩිය සුවඳ මුසු වීම අපේක්ෂා කලෙමි. මා ප්‍රාර්ථනා කල සියලු දේවල් ජීවිතය විසින් මා හට ලබා දී ඇත.
                මා පෙර ආත්මයක් හෝ මතු ජීවිතයක් විශ්වාස නොකරන්නෙක්මි. මිනිසෙකුට ජීවිතය ලැබෙන්නේ එක වරක් පමනි. මා අත්ල මතුයෙහි ඇත්තේ එය ය. එය මා කැමති ලෙස ගෙවාදමමි. අනික් මිනිසුන්ට බියෙන් ඔවුන්ට අවශ්‍ය ආකාරයෙන් දිවි ගෙවීමට මා සූදානම් නොමැත. මගේ ජීවිතයට ඇඟිලි ගසන්නන්ට කීමට ඇත්තේ යකාට පලච්චාවෙ!!!

Thursday, February 23, 2012

රාත්‍රිය මං උඹට ආදරය කරනවා



















අහස් තරු පොලෝ මත
හිතුමතේ පාවෙනා
නෑ කණාමැදිරියෝ,
පුංචි අත් පොකුරු කර
දුව දුවා අල්ලාපු
පුංචි කණාමැදිරියෝ
නිවි නිවී හිනැහෙනා.

පොලෝ මත ඉහිරිලා
නෙක රටා මව මවා
පුංචි සේපාලිකා
රළු බොරළු මාවතේ
පාවාඩ එලනවා.

සඳවතිය තුරුහිසින්
මිහිරි රස පෙරනවා
මම යන්නෙ කොහෙද ඈ
මා ළඟින් ඉන්නවා.

හීල් සුළඟක් ඇවිත්
මාව කිතිකවනවා
විහිළුවට තුරුමඬුලු
සමඟ පොර බඳිනවා.

නින්ද නැති මැඬියෝ ද
දියකඩේ රැස්කකා
එකිනෙකා පරයාන
තර්කයන් කරනවා
‘මොන තරුව වැඩි රුවැති‘
තම මතය පහදනා.

නුඔ යන්නෙ කොහෙද
මේ රාත්‍රිය නොඅසනා
නුඔ ඉන්නෙ කොහිද නුඹ
කොයි කවුද නොඅසනා
කිසි දෙයක් නොපතා ම
ආදරය පුදදෙනා.

මුළු ලොව ම නිදන රෑ
මං තාම ඇහැරිලා
හෙට යලිත් නැඟිටින්න
නින්ද තව හොයනවා
මගේ සුව නින්ද මේ
රාත්‍රිය අහුරනා
රාත්‍රිය මං උඹට
ආදරය කරනවා.

Tuesday, February 21, 2012

සුන්දරත්වය







ඔබ තරම් මෙලොව කිසිවක්
ඒ තරමට සුන්දර නැත
මෙලොව සියලු සුන්දරත්වය
ඔබෙන් පමණක් දකිමි මම.



සමනලයෙක්ගේ මරණය















සමනලයෙක් මැරුණාට
පොළොව හෙල්ලෙන්නෙ නෑ.

මහ එකෙක් නොපාගා
උඩින් යනවා ඇරෙන්න;
පොඩි එකෙක්
කොස් කොලෙන්
ඌව අරගෙන ඇවිත්
මහ පොළොවෙ වළලලා
වල උඩින් වද මලක්
තියා  අඬනවා ඇරෙන්න;
පැපරාසියෙක් විත්
තැළුණු පිහාටු ලංකර
දුක හිතෙන ෆොටෝ එකක්
අරගෙන යනවා ඇරෙන්න;
බිඳුණු සිතැති කවියෙක්
ඌ වෙනුවෙන් කවක්
ලියල දානවා ඇරෙන්න;
වෙන මුකුත් වෙන්නෙ නෑ.

Thursday, February 16, 2012

වචන


















මේ, වචන පමනකී.
මේ වචන පමණකී මා සන්තකව ඇතේ
යන්න ඹබෙ හද සොරා;
ඹබේ මුදු සොඳුරු බව
තවරන්න සුදු පිටු පුරා;
මගේ හද ආදරය
කියන්න මා හිත පුරා.
මේ වචන පමණකී මා සන්තකව ඇතේ,
මේ වචන පමණකී.
මේ, වචන පමනකී.

Tuesday, February 14, 2012

මිනිසුන්ගෙන් සැදුනු කවිය... 
























වැසි සුළං පහර ලැබ
හිරු රැසින් කර ව ගිය
දළ සැකිලි අතුපතර
කටු කොහොල් දැක දැක ම
මලක මුදු මෙලෙක ගැන
සොහොයුර මා ලියනු කෙලෙස. 

මිරිඟු දිය සිළු ලෙලෙන 
ඉර රවන මද්දහන
මහපොලොව කැකෑරෙන
ගිනියමින් දැවි දැවි ම 
මද නලක සුවය ගැන 
සොහොයුර මා ලියනු කෙලෙස. 

පද වැලක මුල් බිජුව 
බෙලි මසට කාවැදුණු
මූදු වැලි කැටය ලෙස
හද මසට කාවැදී 
ඇනි ඇනී රිදුම් දී
ලේ කඳුළු වැල් බැඳී 
කවි මුතු ව ඉපදුනී. 

ඒ කවියේ පේලි අතර 
සිය ගණන් වචන මැද 
දසදහස් අකුරු ළඟ
මොහොතක් නැවතී බලන්න 
මේ පනගැහෙන අකුරු ය;
හද ගැහෙන මිනිසුන් ය.