පොත්ගුල්ලා මං 

කඩෙන් ගේන සීනි ගොට්ට

හතර අතේ හරව හරව

පාර දිගේ එමින් ගමන්

ඒකෙ උන්නු සීනි සීය

බෝතලේට පැන්න ගමන්

හිමීට දිගහැර කියෝපු

පොත් ගුල්ලා මං.

බතපත දිගහැර ලිපි කන

අත වේලෙනකං ලිපි කන

අනිත් උන්ට කන්න නොදී

උන්ගෙ බත් පතෙත් ලිපි කන

පොත් ගුල්ලා මං.

අහල ගන්න බ්‍රේක් නැතිව

අනුන්ගෙ පොත් හොරෙන් ම කන

එහෙම කාල අතුරුපසට

උන්ගෙන් ටොකු හොඳට කාපු

පොත් ගුල්ලා මං.

පොත් සාප්පුවලට ගිහින්

පොත් දහයක් තුරුලු කරන්

එලෝනකං පොත් කියෝන‍

පොකට්ටුවේ බර සින්දා

දහයට එකකින් තුටුවෙන

පොත් ගුල්ලා මං.

ගත් පඩියෙන් බඩට නොකන

පරණ ඩෙනිම පට්ට ගහන

ඇඟ බිල්ඩින් ගැන නොහිතා

ඔළු බිල්ඩින් ගැන තැවෙනා

ගෙදර පතල කාබාසිනි

පොත් ගුල්ලා මං.

අතේ පිච්චියක් නැතිකොට

උකසට රන්ලණු නැතිකොට

තියෙන එකම වස්තුව වෙන

පොත්ටික කද බැඳ ගෙනිහින්

සරසවි පාරේ විකුණන

ලොව ම ඉන්න කාලකන්නි

පොත් ගුල්ලා මං.